De Penis inferni 1

In inferno enim est carentia omnis boni et habundantia omnis mali. Unde versus: Flamma, frigus, fetor, vermes, tenebreque, flagella, demonum aspectus, scelerum confusio, nexus. Inde stupor, fletus, horror, depressio, luctus, stridor, clamor, nulla spes est, semper ac ululatus. Est locus indignis ubi non extinguitur ignis. Nec qui torquet, nec qui torquetur, morietur. Ordo nullus, fumus ibi, perpetua pena, fames, gemitus, sitis est et potus amarus, anxietas maior dolor est amissio regni.

De Penis inferni 2

Bernardus in libro contemplationum: Quis, putas, tunc meror erit, quis luctus, que tristicia cum separabuntur impii a consortio iustorum et a visione dei, et traditi in potestate demonum ibunt cum ipsis in ignem eternum, ibique erunt sine fine in luctu et gemitu. Procul quippe exulati a patria paradisi, cruciabuntur in gehenna perpetua, nunquam lucem visuri, nunquam refrigerium adepturi, sed milia milium in inferno cruciandi, nec unquam inde liberandi, ubi nec qui torquet aliquando fatigatur, nec qui torquetur aliquando moritur. Sic enim ignis consumit ibi ut semper reservetur, sic tormenta aguntur ut semper renoventur. Iuxta vero qualitatem culpe penam sustinebit unusquisque, nil aliud audietur ibi nisi fletus et planctus gemitus et ululatus, merores atque stridores dentium, nichilque ibi videbitur nisi vermes, et latebre facies tartaree atque teterrima monstra demoniorum. Vermes crudeles mordebunt intima cordis. Hinc dolor, hinc pavor, gemitus, stupor, dolor, horror. Ardebunt miseri in igne eterno in eternum et ultra. In carne cruciabuntur per ignem, in spiritu vero per conscientie vermem. Ibi erit dolor intollerabilis, fetor inconparabilis, timor horribilis, mors corporis et anime, sine spe venie et misericordie. Sic enim morientur ut semper vivant, et sic vivent ut semper moriantur.

De Penis inferni 3

Gregorius super illud Iob XX: Devorabit eum ignis qui non succenditur, ait: Quippe exprimitur ignis gehenne qui corporeus malos corporaliter uret, nec ut iste noster est qui studio hominis succenditur. Non enim lignis nutritur, sed creatus semel semper permanet.