De Laude Domine Nostre 1

In laude virginis gloriose omnis humana eloquentia deficit, et quasi concluditur cum virginis laudes cogitat explicare. Unde quasi balbutiendo sancti eam laudaverunt, nam quis digne eam laudare queat, quia quem celi capere non poterant conclusit gremio suo beato.

FONS

De Laude Domine Nostre 2

Unde Anselmus: O pulcrum ad intuendum, o admirabile ad contemplandum, o desiderabile ad amandum, quomodo effugis capacitatem cordis mei? O virgo mirabilis, o virgo singularis et singulariter mirabilis, per quam elementa renovantur, inferna spoliantur, demones conculcantur, angeli redintegrantur!

FONS

De Laude Domine Nostre 3

Bernardus: Non est dubium, quin quidquid in laude matris profferimus, ad filium pertinere, et rursum, cum filium honoramus, a gloria matris non recedimus.

FONS

De Laude Domine Nostre 4

Bernardus: Ille solus a laude virginis taceat, qui eam fidelem advocatam in suis negotiis senserit defuisse. Si surgant venti temptationum, si incurras scopulos temptationum et tribulationum, respice stellam, voca Mariam. Si iracundia aut avaritia aut carnis illecebra turbant mentis naviculam, respice Mariam. Si criminum immanitate, conscientie feditate confusus, iudicii horrore perterritus, baratro incipias absorberi tristitie, et desperationis abisso, cogita Mariam. In periculis, in angustiis, in rebus dubiis, Mariam cogita, Mariam invoca. Non recedat ab ore, non recedat a corde, et ut impetres eius orationis suffragium, ne deseras conversationis exemplum. Ipsam sequens non devias, ipsam implorans non desperas, ipsam cogitans non erras. Ipsa protegente non metuis, ipsa duce non fatigaris, ipsa propitia pervenis.

FONTES

De Laude Domine Nostre 5

Bernardus: Ubi nomen Marie exprimitur, ibi nomen demonum effugatur.

FONS

De Laude Domine Nostre 6

Ambrosius de virgine Maria: Corde virili erat, verbis gravis, animo prudens, loquendi parcior, legendi studiosior, intenta operi, verecunda sermoni. Illa pia mater ymmani dolore evigilans, pectora delicata contundens, ita corpus et omnia conquassaverat membra, ut vix potuisset pervenire ad Christi funus.

FONTES

De Laude Domine Nostre 7

Ieronimus: Beata dei genetrix in ea parte passa est, que impassibilis habetur, ideo, ut ita fatear, quia spiritualiter ac atrocius passa est gladio passionis Christi plus quam martir fuit.

FONS

De Laude Domine Nostre 8

Origenes: Sicut solis radius intrat innoxius fenestram vitream, ita dei filius ymmo longe subtilius aulam virgineam.

FONS

De Laude Domine Nostre 9

Bernardus: Sicut apis sugit florem, et illesum servat decorem, dulcedinem et odorem nulla monstrans vestigia, sic Christus matris pudorem, et virginitatis candorum, immo subtiliorem et sublimiorem servarit per omnia.

FONS

De Laude Domine Nostre 10

Bernardus: Si queris quomodo virgo genuit salvatorem, respondeo sicut flos vitis odorem inviolatum crede pudorem, eo quod genuit salvatorem, sed cave ne bono moraris odore sicut bufo vel serpens.

FONS

De Laude Domine Nostre 11

Augustinus: Considero conceptum tuum beata virgo et expavesco, intueor partum tuum et contremisco, adoro filium tuum et reverisco.

FONS

De Laude Domine Nostre 12

Augustinus: Beatior fuit Maria concipiendo fidem Christi quam carnem Christi.

FONS

De Laude Domine Nostre 13

Gregorius: Maria copiosissima caritate, omnibus misericordie sinum aperit, ut de pleniludine sua accipiant universi, captivus redemptionem, eger curationem, tristis consolationem, peccator veniam, iustus gratiam, angelus letitiam, tota trinitas gloriam, ut non sit qui se abscondat a calore eius.

FONS