De Correctione Fraterna 1

Qui aliena vitia et peccata corrigere et reprehendere debet mundum oportet esse.

FONS

De Correctione Fraterna 2

Unde Augustinus: Mundus esse debet, qui aliena corrigit. Quomodo enim videt maculam in alieno oculo, quem pulvis gravat in suo? Vel quomodo absterget sordes manus, que lutum tenet?

FONS

De Correctione Fraterna 3

Ambrosius super psalmum beati immaculati in via: Iudicet ille de alterius errore, qui non habet quid in se ipso reprehendat, aut quod sit dampanandum. Iudicet ille qui non agit eadem que in alio putaverit punienda, ne cum de alio iudicat, in se ferat sententiam.

FONS

De Correctione Fraterna 4

Isidorus: Plerumque princeps iustus etiam malorum errores dissimulare novit, non quod iniquitati eorum consentiat, sed quod aptum tempus corrector expectet, quando eorum vitia vel emendare valeat vel punire.

FONS

De Correctione Fraterna 5

Gregorius in moralibus exponens illud: Qui sine peccato est etc. ait: Postulatur dominus iudicare peccatricem, non statim dedit iuditium sed prius se inclinans deorsum, in terra scribebat nos tipice instruens, ut cum quelibet proximorum errata conspicimus, non ante ea reprehendendo iudicemus, quam ad conscientiam nostram reversi, digito discretionis, quid in ea conditori placeat quidve displiceat examinemus iuxta illud apostoli: Considerans te ipsum ne et tu tempteris. Unde qui sine peccato est ait: Prius vos ipsi iustitiam implete, et sic innocentes ad lapidandam ream concurrite.

FONTES

De Correctione Fraterna 6

Gregorius: Qui semetipsum aspicit, non querit in alienis quid frequenter reprehendat, sed in se ipso lugeat.

FONS

De Correctione Fraterna 7

Gregorius: Ille scit recte dicere, qui et ordinate novit tacere. Quid enim prodest eo tempore errantem corripere, quo alienata mente non aliena verba percipere, sed semetipsum vix valet tollerare furientem?

FONS

De Correctione Fraterna 8

Gregorius: Cavendum est ne tempore luctus increpatio fiat, quia etsi recte quidam debent increpari, non tamen in affictione, ne qui lenire debent dolorem augeant.

FONS

De Correctione Fraterna 9

Augustinus: Mali amant veritatem latentem et odiunt veritatem redarguentem.

FONS

De Correctione Fraterna 10

Augustinus: Iniqum est ex suspicione reprehendere eum, cuius opera non videntur nisi bona.

FONS

De Correctione Fraterna 11

Bernardus: Indignatus sum contra alios, qui me de vitiis meis arguebant, et quos amare debui, odivi.

FONTES

De Correctione Fraterna 12

Hugo in libro de claustro anime: Volunt quidam esse severi, sed nesciunt quia dum volunt esse severi, crudeles inveniuntur. Iram pro severitate, amaritudinem pro dulcedine, pro rectitudine crudelitatem ostendunt, et sic confunditur vultus religionis, ubi ex flamma crudelitatis ignescunt oculi, pallor miscetur livori, qui procedunt ex ira et amaritudine. Ira prelati peccantem turbat, amaritudo prosequitur, crudelitas affligit. Iram prelati causam dat perverso, iustumque provocat ad iram.

FONS

De Correctione Fraterna 13

Isidorus: Sepe iustitia dum suum modum excedit, et cetera require supra.

FONTES

De Correctione Fraterna 14

Gregorius super illud Canticorum: Mel et lac sub lingua eius ait: In lingua iusti est asperitas dum perversum increpat, sed intus dulcedinem regit quam non vult ostendere nec aperire infirmis, sed inter dura emittit etiam blanda, quibus auditores foveat.

FONS

De Correctione Fraterna 15

Gregorius super illud: Sicut lilium inter spinas, ait: In ecclesia nec mali sine bonis, nec boni sine malis esse possunt, bonus vero non fuit, qui malos tolerare non potuit.

FONS

De Correctione Fraterna 16

Gregorius super Ezechielem: Si autem qualiter dicatur, et quid dicatur, et quibus dicatur, non vigilanter aspicitur, valde periculosum est. Verecunde etenim mentes, si quas fortasse culpas conmiserint, leviter arguende sunt, quia et si asperius increpentur, franguntur potius quam erudiantur. At contra mentes asperas quia imprudentes, si increpate leviter fuerint, ad maiores culpas ipsa lenitate provocantur. Nisi enim verecunde mentes fuerint palpando reprehense, ita ut ex aliis rebus audiant, quod in consolatione sumant, per increpationem protinus ad desperationem cadunt.

FONS

De Correctione Fraterna 17

Gregorius: Leniter castigatus reverentiam exhibet castiganti, asperitas ac nimietas correctionis, nec reverentiam exigit nec salutem.

FONS

De Correctione Fraterna 18

Ieronymus: Sit rector discretus in silentio et utilis in verbo, ut dicenda non taceat, et tacenda non dicat.

FONS

De Correctione Fraterna 19

Bernardus: Multitudinem iniquitatum mearum expavescens, aliorum iniquitates reprehendere timui, et ideo mortis actor extiti, quia virus quod clamando expellere potui, non expuli.

FONS

De Correctione Fraterna 20

Bernardus: Nemo dicat: Numquid custos fratris mei sum ego? In quantum interest equanimiter ferre, cum videris ordinem deperire minui disciplinam. Est consentire, cum arguere posses, quia agentes et consentientes pari pena puniuntur.

FONS

De Correctione Fraterna 21

Gregorius: Sepe rectores inprovidi humanam gloriam amittere formidantes, loqui libere recta pertimescunt, quibus provenit ve propheticum qui dixit: Ve mihi quia tacui.

FONTES